منتدى يجمع عشاق ملك القلوب شادي وامير الرومنسية هادي
 
الرئيسيةالبوابةمكتبة الصوربحـثالتسجيلدخول

شاطر | 
 

 أقدم لقاء مع شادي بإزاعة المدينة

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
أكتر وحدة بتحبهم بلعالم
عضو نشيط
عضو نشيط
avatar

انثى عدد الرسائل : 141
تاريخ التسجيل : 04/01/2008

مُساهمةموضوع: أقدم لقاء مع شادي بإزاعة المدينة   الثلاثاء فبراير 12, 2008 5:28 pm

هادا لقاء مع ابو الشود في اذاعة المدينة قديم شوي
بس كتير مهضوم

بدأ الساعة 11.15ليلا مع التعريف عن شادي أسود من قبل المذيع فاروق درزة ثم السؤال عن أحوال شادي

فاروق : كيفك شادي ؟

شادي : مشتقلك ( ثم غنى في البداية مقطع من أغنية تعي لعندي )

مشتقلك بدي شوفك زاد الشوق بقلبي كثير لا تقولي صعبة ظروفك يلي بيعشق ما عنده كبير ( شادي يقول مع الأغنية يلي بيعشق بيضل صغير )

ثم يعرضون مقطع تعي لعندي و يعلق شادي ( كنت عم صلح الدولاب تبع السيارة )

فاروق : إنما بالبداية مين اختار الأغنية ؟

شادي : أنا الحمد لله بكل تواضع

فاروق : كيف صار الاتفاق , كيف حصلت عليها , كيف سمعتها ؟

شادي : كنت عم دور على أغنية و كان الملحن الأستاذ نهاد نجار و كان في اتصال بيني و بينه و قال لي اصبر جايبلك معي وحدة حلوة و نزل جايبلي 3-4 أغاني سمعتهم كلهم و اخترت 2 منهم وحدة منهم هي تعي لعندي يعني حسيتها ظريفة ما حدا قال لوحدة تعي لعندي من قبل و حتى طلعتها حلوة مشتقلك بدي شوفك......

فاروق : قلت انو اخترت 2 شو هن ال2 ؟

شادي : وحدة بتقول : / بحبك ما بقولها إل لقلبك حبيتك ما بعرف كيف عيشتيني حب نظيف / و هي بعدا معي ( يضحك)

و الثانية تعي لعندي و نزلتها أول الشي لأنو الموزع وقت يلي سمعها عجبته لأنو فيها شي غريب و كانت غير كل الأغاني يلي نزلت بوقتها , و كمان الكلام كان حلو لأنو المؤلف منير أبو عساف شخص حساس و كثير مرهف و على فكرة معظم الألبوم من كلماته .

فاروق : خدمتك الأغنية أو لأ ؟

شادي : أي أكيد خدمتني كثير لأنو في ناس كثير ما كانوا يعرفوني و ما يعرفوا شو يعني سوبر ستار و لا حضروه بس إتفاجأت إنهم حافظين الأغنية حتى من فترة كنت بالعقبة بالأردن كان في أشخاص من أوكرانيا عم يغنوا الأغنية بس ما بيعرفوني و رن تلفوني و أنا حاطط هالرنة فقالوا لي إنو الأغنية كثير حلوة و بلشوا يغنوها .

فاروق : خلينا نحكي شوي عن شادي أسود , شو يلي خدمك أكثر صوتك أو هضامتك أو شكلك بسوبر ستار؟

شادي : الثلاثة لأنو في ناس ما حبت صوتي و لا شكلي حبوا هضامتي ... و هيك .

فاروق : شادي شو برجك ؟

شادي : برجي الأسد .

فاروق : يعتبر برج الأسد شوي سريع الغضب و سريع الرضا كما يدل عن طيبة قلب .

شادي : / مقاطعا / و سريع العطب أنا لما بسافر بيحطوا لي بطاقة على ضهري مكتوب عليها قابل للكسر / يضحك /

فاروق : هل أنت عاطفيا قابل للكسر ؟

شادي : أنا عاطفيا بتأثر كثير بس الحمد لله بنسى التأثر .

فاروق : أنت هلأ عايش قصة حب ؟

شادي : كل يوم بعيش قصة حب الحب الأكبر هلأ لأهلي و لفني بشكل أساسي هاد جواب دبلوماسي بس أكيد في حب .

فاروق : أي رقم هالحب بالنسبة إلك ؟

شادي : بالنسبة إلي رقم واحد الحب الأخير دايما هو الحب الأول / يضحك / .

ثم يتلقوا اتصالات من عدة معجبين ......

فاروق : بدنا نحكي عن باكورة أعمالك كانت .. / شادي مقاطعا بكرة السلة و يضحكان / .. كانت تعي لعندي و أكيد في عدة أغنيات بالألبوم يلي نحن موعودين فيه , هو عبارة عن كم أغنية ؟

شادي : عبارة عن 8 أغنيات 6 منهم كلما منير أبو عساف و وحدة كلمات نزار فرنسيس و الألحان نهاد نجار و وسام الأمير و رواد رعد و في وحدة من ألحاني / يضحك /

فاروق :شادي بداياتك بتذكرني ببدايات راغب علامة , بتحس حالك قريب منه أو لأ ؟

شادي :أنا بحبه لأنو بيقدم حلو و إحساسه حلو بحس حالي قريب لأنو بتمنى إنو كون متله .

ثم حطوا أغنية كوني أكيدة كاملة .

فاروق :على طول شادي أسود مشاغب ... شادي بتلاحظ إنو الأغنية هي غير هديك كل وحدة لون .. شو الألوان يلي مغناها بالألبوم ؟

شادي : في ألوان كثير رايقة و في أغنية كثير شعبي و في كلمة بيضا الكلمة المفهومة وين ما كان .

فاروق : برنامج سوبر ستار كمؤسسة بعدهم عم يخدموك أو لأ ؟

شادي : كل شي تمام بس الفرق إنو أنا مو ماضي معهم أو مع حدا تاني .

فاروق : ليش رفضت تمضي معهم ؟

شادي : لأ ما رفضت بس يلي صار إنو أنا / كبرت الخسة براسي / و بدي ضل لحالي هيك قررت أنا و كمان صار أكثر من ظرف ..

فاروق : طيب و هادي؟

شادي : هادي ماضي معهم متل كل المشتركين ال17 الجداد و بعدين أنا لهلأ إذا بدهم مني شي بخدمهم بعيوني و إذا أنا بدي منهم شي ما بيقصروا معي

فاروق :هل بتعطي هادي نصائح و بيعطيك هو نصائح أو لأ؟

شادي : هلأ نحن بالفن ما منتخل كثير ببعضنا هو لون و أنا لون بس بالبيت عادي إخوة منحب بعضنا كثير و منحترم بعضنا .

فاروق : بتحس إنو هو لون و إنت لون و هو ستايل و إنت ستايل ؟

شادي : أي أكيد ما في غير تشابه بالشكل يمكن بس ... / يضحك /

فاروق : بشو حبيته لهادي بأي أغنية غناها بالبرنامج حبيته ؟

شادي : أنا بحبه بكل شي لأنو بالأصل أخي الصغير بحبه كثير بحبه بكل شي و شو ما عمل بحبه . و هو إشتغل على حاله كثير بالبرنامج لأنو هيك ستايله بيحب إنو نحن هنا إنو شوفوني أنا موجود / يضحك /

فاروق :هل إنت بتأيد القول يلي بيقول / وشوشني و إطربني؟

شادي : يلي قال هالكلام هو الموسيقار محمد عبد الوهاب و أنا ما رح إحكي من بعده و قول لأ لأنو في ناس بتحب الطرب على العالي و في ناس بتحه على الخفيف يعني / وشوشني وإطربني / يضحك /

فاروق :رح نسمع أغنية تعي لعندي بس هي الأغنية لمين بتهديها بالذات ؟

شادي : / بعد تفكير طويل يضحك / ما فيني سمي بيزعلوا بس بهديها لها و له و لكل الصبايا و أنا بهديها للشباب يلي بيحبوا لأني الناطق الرسمي بإسمهم .

فاروق : صار وجهه أحمر لو بتشوفوه .. إنت النطق الرسمي بإسمهم و بإسم الحب ../ و يضحكان /

حطوا أغنية تعي لعندي و بعدها حطوا موسيقى هادئة

فاروق : شادي شو بتسمع بالعادة ؟

شادي : بسمع أغاني هادئة كثير كثير .

فاروق : شادي إيمتى بتنام عادة؟

شادي : مشكل أيام الساعة7 الصبح أو 5 و أيام من وش الليل بس بشكل عام الساعة 12 أو 12.30 أو 1 بالليل.

فاروق : صاير رياضي قديش إلك عم تلعب ؟

شادي : سألني قديش إلك واقف عن لعب الرياضة / يضحك / صرلي 4 أشهر تارك اللعب بس بدي إرجع زايد شي 3-4 كيلو لازم نزلهم قبل الكليب

فاروق : يلي بتحبها شو برجها؟

شادي : برجها الحوت و إمي برجها الحمل / يضحك / و شعرها أسود و عيونها سود صغار و بيضلوا يضحكوا و لما العيون بيضحكوا و بيحكوا أهم شي .. / قال أنا كذاب كبير حاببلي شي 20 وحدة كلهن شعرهن أسود و عيونهن سود و يضحك /

فاروق : الألبوم صار جاهز بإنتظار شركة التوزيع صح ؟

شادي : مظبوط أنا أنتجت الألبوم و عم إنتظر شركة التوزيع الجيدة

فاروق : رح ننتظر كثير أو لأ؟

شادي : بعد تفكير حسب الجو

فاروق : تعي لعندي كان الكليب كثير حلو و الفكرة ذكية و البنات حبوك كثير فيه مين المخرج و وين صورتوا؟

شادي : لأ لا و الله مشان ما نظلم البنات و يكبر راسي أكثر أنا / يضحك / الفكرة كانت إنو ما يكون معي بنت لأنو أنا عم غني للصبية مشتقلك و تعي لعندي فما كان لازم يكون في بنت لأنو هي مو عندي و كمان مشان يكون التركيز عليي أكثر لأنو أنا قطعت فترة كبيرة من يعد السوبر ستار و ما طلعت ببرامجهم أبدا حتى يتذكر الناس إنو شادي يلي كان بسوبر ستار بعده هون و الحمد لله كثير إنحب الكليب و إنطلب كثير و بعدين في شغلة أنا بشكر الله عليها الحمد لله و بفضل الله إنو صرلي 10 أشهر عم إشتغل و إنطلب على أغنية وحدة الحمد لله و يلي أخرج الكليب هو شب جديد إسمه هاني خشفة هو أول عمل إله معي و صورناها بالجنوب بمنطقة الخيام بفيلا

فاروق : هل في فكرة كليب للأغنية التانية ؟

شادي : أي أكيد الفكرة موجودة و جاهزة هي ستايل هوليود الكليب تبع كوني أكيدة رح يكون فكرة جديدة ما تقدمت يمكن من قبل أو إذا تقدمت يمكن مو بالطريقة هي .

فاروق : بتحس حال خرج تمثيل أو لأ ؟

شادي : لأ أنا مو خرج تمثيل أبدا أنا بدي مخرج إتعامل معه شاطر هو يطلع كل القصص يلي عندي .

فاروق : يعني بالحياة ما بتمثل على حدا و لا بالحب؟

شادي : لأ الحمد لله أبدا ما بحب مثل على حدا

فاروق : يعني إيمتى ممكن ينزل الألبوم؟

شادي : يعني ناطر شركة توزيع و بيجوز نزل أغنية لحالها بعد كوني أكيدة لسه ما بعرف ...

فاروق : الألبوم شو رح تسميه ؟

شادي : يعني بعد وحدة تعي لعندي و وحدة جاية لعندك يعني المفروض إنو بالأخير منلتقي هيك شي / يضحك /

فاروق : إنت بتتميز إنك وسط عيلة بتدعمك و بتساندك و هاد شي قليل يصير لأنو الأغلب بيرفضوا هالشي فكيف الدعم معك ؟

شادي : أنا أبي الله يطولي بعمره هو من أول الأشخاص يلي دعموني و شجعوني و هو يلي إكتشف إنو صوتي حلو و جاب لي عود و حطلي أساتذة و ما قصر معي أبدا و أنا كنت كثير مدلل و مغنج و صغير و كل ما كان العود ينتزع دوزانه إكسره و فكر إنو خلص صار للكب / يضحك / و أبي هو يلي فهمني إنو أنا زلمة لازم كون فنان حتى كبرت و أدركت هالشي فيي

فاروق : أول إطلالة إلك كان في خوف بس هلأ شو كيف بتوصف شعورك؟

شادي :أنا لهلأ كا مرة بطلع بحس حالي إني أول مرة بطلع يعني لسه في رهبة

فاروق : أجمل لحظات قضيتها بحياتك؟

شادي : بصراحة ما في لحظة معينة بس أنا هلأ عايش حياتي كثير حلوة يعني كل اللحظات حلوة الحمد لله

فاروق : لما بتحضر حالك أيام السوبر ستار بتنتقد حالك أو بتحاسب حالك؟

شادي : لأ بصراحة بكره حالي / يضحك/

فاروق : شو قصة يؤبوش الناس بتضلها ترددها من بعدك ؟

شادي : هي طلعت معي هيك على زعرنة / يضحك/ قال لي المذيع أيمن القيسوني و شو رأيها المدام تونيا قلت له المدام تونيا يؤبوش / يضحك/ على زعرنة صغيرة طلعت و درجت

فاروق : شادي اللقاء لهون إنتهى شو بتحب تقول بالنهاية ؟

شادي : أنا بدي إشكرك كثير كنت مشتقلك كثير و كنت بتمنى شوفك لأنو ظروف الحياة شو ما بتسمح بس الحمد لله اليوم شفتك بفضل إذاعة المدينة وبشكركم كثير كثير / يضحك/

أنا بحب كل الناس و برتاح لما بنزل بين الناس و بمشي بينهم و تانكيو إلك فاروق باي

فاروق: شكرا إلك و أنا من الصفوف الأمامية من المعجبين فيك و بحبك كثير لأنك فنان حقيقي بكل معنى الكلمة
[b]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://aswadsbrothers.phpbb9.com/profile.forum?mode=register&
جنوني شادي وهادي
عضو على وسام الشرف
عضو على وسام الشرف
avatar

انثى عدد الرسائل : 427
العمر : 30
البلد : الـــســـعوديه
تاريخ التسجيل : 04/02/2008

مُساهمةموضوع: رد: أقدم لقاء مع شادي بإزاعة المدينة   الثلاثاء فبراير 12, 2008 10:48 pm

يؤبشني ع هالحكيات والله كل شي قديم بحس حالي اول مره بئقراه ثانكس كتير ويســــــــــــــــــــــلـــــمــــــوووووو..
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://google.com
 
أقدم لقاء مع شادي بإزاعة المدينة
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديـــــــــــــــــــــــات الاخـوين شــــــــــــادي وهـــــــــــادي اسود :: منتدى شــــــــــــــــــــادي اسود :: «(·´¯`·.·÷×اخر اخبار شـــــــــــــــــــــــــادي اسود×÷·.·´¯`·)»-
انتقل الى: