منتدى يجمع عشاق ملك القلوب شادي وامير الرومنسية هادي
 
الرئيسيةالبوابةمكتبة الصوربحـثالتسجيلدخول

شاطر | 
 

 مقابلة هادي في المدينة تغني

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
أكتر وحدة بتحبهم بلعالم
عضو نشيط
عضو نشيط
avatar

انثى عدد الرسائل : 141
تاريخ التسجيل : 04/01/2008

مُساهمةموضوع: مقابلة هادي في المدينة تغني   الثلاثاء فبراير 12, 2008 7:28 pm

[b]بدأ اللقاء بمقدمة لذيذة قدم فيها باسل بشكل رائع هادي
باسل : مساء الخير للكل بحلقة جديدة و مميزة من المدينة تغني
/ و طبعا هادي مع أنه لسه ما بلش باسل بتقديمه كان عم يشاغب و يحكي و
يتحرك كثير و يضحك /
باسل: اليوم عنا حلقة خاصة و مميزة جدا لأنه ضيفنا اليوم كثير مميز
ضيفنا لليوم نجم بيلمع و لما يغني لازم نسمع
بصوته و طلته قدر قلوب الكل صغار و كبار يجمع
راح الليل و أجا النهار و قدر أنه يصير ستار
بيته قلوب الناس اختار و بيستاهل يكفي المشوار
الله ما في عند حجار كلمة انتقدوها كتار
مع أنه المعنى واضح و الجملة قديمة ما لها بنت امبارح
بصوت و سحر فوق العادي هو اليوم رح ينور حلقتنا أهلا و سهلا بهادي
هادي أسود نجم سوبر ستار بأول إطلالة له بسوريا

هادي : / يضحك / شو بدي أحكي خجلتني بهالمقدمة الحلوة

باسل : كيفك هادي ؟

هادي : بشوفتك منيح صرت و أنا مبسوط كثير لأني أول مرة بإذاعتكم و أنا
مبسوط عنجد كثير ..

(حطوا أغنية الله ما أكبر غلاك لما غناها بسوبر ستار، و طبعا هو صار يغني
مع الأغنية و صار يقول الله و هو عم يسمع الأغنية و يضحك)

باسل : بدي أرجع رحب بهادي من جديد و رح نتلقى كل اتصالاتكم إذا حابين
تطرحوا على هادي أي سؤال ..

هادي يقاطعه : تفضل هالقلم هدية مني لك باسل تفضل

باسل : ييي يا حبيب قلبي تسلم كثير
(و بعدها حصل المقلب و هو أنه هادي جايب قلم بيكهرب و عطاه لباسل و هون
باسل أتكهرب بس ضحك و كانوا كثير مهضومين
و هادي صار يضحك كثير )

باسل : هادي جايبلي قلم مكهرب بس حلو حبيت الفكرة

هادي : أي خده و هذا لك أكتب فيه / و يضحك /

باسل : / يضحك / رح أقرأ بعض الإيميلات يلي وصلوا لهادي و أولهم من هلا من
القامشلي هي كثير بتحبك و بتقول أنت أحلى نجم بالكون و بتتمنى تلفظ
اسمها بصوتك و لو مرة وحدة

هادي : هاي هلا كيفك؟ أنت لو تعرفي باسل قديش حلو كنت بطلتي تقولي إني
أحلى واحد ..

باسل : شكرا هادي ، كمان إيميل بيقول هاي باسل سمعت أنه القمر نزل
لعندك اليوم بقول لأحلى قمر حبيبي هدوش تؤبوش قلبي .. شو قصة تؤبوش قلبي
بين شادي و هادي ؟؟

هادي مقاطعا : الكلمة عنا عادة و كثير منحبها ..

باسل : أها طيب منكمل الإيميل كمان شو أخبارك طمنا عليك وين صرت بعدكليب
بيستاهل قلبك و بتطلب تغني آسف حبيبتي و بتقول لكل جروب هادي و شادي
هاي و بتسأل وين أغانيكم الجديدة ؟
و منحبكم كثير و سلام معطر من شهد من العراق

هادي : شكرا كثير لشهد و تحياتي لك

باسل : هادي القلم شيله من وجهي لأنه ما بدي ياه و ما بقى بدي
أستعمله /و يضحك / ،

هادي : / يضحك / خبرهم شو صار فيك / و يضحك / ،

باسل : هادي جايب معه قلم مكهرب بيكهرب عنجد و أنا قلت شو هالخير و
الكرم يلي عم يعمله هادي طلع جايب معه قلم بيكهرب / و يضحكان /
( و حطوا مقطع من بيستاهل قلبك )

باسل : من البداية هادي عرفت أنه أول حفل كان لك و حضروه الناس كان
عمرك 13 سنة بالشام بمعرض الزهور مزبوط؟

هادي : أي صح ،

باسل : شو حسيت وقتها و كيف استقبلك الجمهور و شو غنيت بوقتها ؟ ،

هادي : وقتها غنيت 5 أغاني بفترة ثلاث أرباع ساعة و طلعت هيك و كنت ملبك
و غنيت منرفع أيدينا و معقول تشتي بآب و الدلعونا و كانت كثير مهضومة
و .....

باسل : هادي شو مواليدك ؟

هادي / يضحك و يمزح مع باسل /: ما علمتك أمك ما تسأل حدا على
مواليده؟ / و يضحك /

باسل : لا ما علمتني / و يضحك/

هادي : هلأ المهم خلينا نكمل بالفن /و يضحك / هلأ مواليدي ب 24/7 و بس
ما رح قول .. يعني أنا كنت على زمان هتلر يعني قديم / و يضحك /

باسل : على كل هم لما بيكبروا بيبطلوا يقولوا عمرهم و بس يكونوا صغار
شوي كمان بيبطلوا يقولوا فلازم يكونوا بالوسط و يقولوا
(حطوا أغنية بستان ورود يلي غناها هادي بالسوبر ستار و صار كمان يغني
معها و يقول الله و يضحك )

باسل : عنا إيميل بيقول هادي مرحبا أنا بحبك كثير كثير و بدا إني قلك
أنها هي كثير بتموت عليك و أنت كثير مهضوم و بتجنن و الكليب عجبها كثير
و حابة تسألك إذا عم تحضر لألبوم جديد أو أغنية و يلي باعتة
هالإيميل هي حنان إلياس من فلسطين

هادي : حبيبة قلبي حنان شكرا لك و شكرا كمان لكل أهل فلسطين و بالنسبة
للسؤال هلأ بدي أسافر على أمريكا و بعدها رح أرجع و بلش بأغنية ثانية إن
شاء الله ،

باسل : بيستاهل قلبك بتحس أنها لها شي معين بقلبك باعتبارها أول مولود
فني لك ؟

هادي : أي أكيد بس ما بقلك راضي عنها 100% بس أنه كمان صارت لي فرصة و
أخذت من ملحن و كاتب كبار أكيد و بالنسبة لي كمبتدئ كثير منيح أني بلشت
معهم هن أشخاص كبار فنيا أكيد

باسل: بالنسبة لدراستك الفنية هادي عرفنا أنك عم تدرس بالمعهد العالي
للموسيقى كيف قررت تدرس موسيقى ؟؟

هادي : لأنه أنا بحب الموسيقى حبيت أتعلم الموسيقى أكثر و أعرف عنها
أكثر و هلأ مبلش إن شاء الله بالدكتوراه يلي بدها حوالي 15 سنة كمان لآخذها
و أنا على فكرة دارس بحلب موسيقى كمان ،

باسل : يعني هادي بدها الموسيقى كل هالدراسة يعني أنت عندك صوت حلو و
حضور مميز و عملت نجاح يعني بالنتيجة شو هدفك من كل سنين الدراسة
الموسيقية ؟؟

هادي : بالنهاية هدفي أني لما قدم شي للناس أعرف شو عم أعمل و شو عم
قدم لهم و احتراما للعالم لازم كون دارس ،

باسل مقاطعا : بس في كثير ناس عم يطلعوا و عم ينجحوا و ما بيكونوا
دارسين موسيقى ؟

هادي : أي أكيد بس أنه شي بيكمل شي يعني أنا بحب أنا شخصيا بحب أني كون
متعلم موسيقيا بحب أني كون بعرف شو عم اشتغل ،

باسل : طيب الفترة يلي سبقت اختيارك لدراسة الموسيقى كان في اختيارات
ثانية ؟؟

هادي : أنا أساسا مصمم أدرس موسيقى يعني خلصت البكالوريا و دخلت موسيقى
و سجلت بالجامعة بحمص ترجمة / و يضحك / و لحد هلأ ما داومت طبعا لأنه
الوقت ما عم يساعدني كثير بس أنه أن شاء الله
بيمشي الحال ،

باسل : منأخد اتصال من دارين و بتسلم على هادي

باسل : عنا sms كثار بس ما رح أقدر أقرأهم كلهم بس هادي رح يقرأهم و
هيك بيوصلوا سلاماتكم له و كمان رح نأخذ اتصال من ميمي
(و سلمت على هادي و هو كان كثير مهضوم لما كان عم يأخذ الاتصالات و كمان
كان خجلان كثير)

باسل : هادي حكينا أمبارح بشغلة أنه بالفترة يلي طلعت فيها و صرت نجم
أرتبط اسمك لأنه شادي سبقك بسوبر ستار بشادي يعني بتشعرأنه هالشي ممكن و
لو بشكل أو بآخر أنه يظلمك لأنه أخوه لشادي أسود ؟

هادي مقاطعا : لا لا أبدا ما بيظلمني هالشي بالعكس أنا بفتخر أنه أخي
شادي بس لقلك شغلة يعني أول ما بلشت هالشي أكيد العالم ما رح تعرف مين
أنا بس أنعرف أنه أخوه لشادي و بداية البرنامج أنا بقلك
هالشي ساعدني أكيد بعدين أنا صرت اشتغل على أنه أخوه لشادي كمان منيح
أسمعوه و صرت أشتغل على حالي لحتى عرفوا هادي أسود و بالنهاية أنا و
أخي منكمل بعض فأنا أكيد مبسوط و ما بزعل أبدا من
هالموضوع

باسل : على كل تحية كبيرة لشادي يلي كان نجم سوريا لعام 2005 و كان
بضيافتنا بحلقة خاصة ، رح نأخذ اتصال

باسل : مساء الخير يا هلا ،

عليا: مساء الفل و الورد و الياسمين لأحلى باسل و لأحلى هادي ،

هادي يمزح : أنا بدي فل أكيد أنا الفل و أنت الياسمين ،

باسل : مين معي ؟ ،

معك مدمنة شادي و هادي عليا ،

باسل : عليا الإيميل تبعك قدامي هلأ بقرأه لهادي شو رأيك ؟

عليا: أوكي على كل حال أنا ما عم أعرف أحكي لأني ما بعرف ليش ملبكة مع
أنه مو أول مرة بحكي معك باسل أو مع هادي

باسل : أنت طلبتي تسمعي من هادي أغنية بالغرام لوائل كفوري بصوته ،

عليا: أي صح و برجع هلأ بطلبها لأني حابة كثير أسمعها منه و بدي وجه له
تحية لهادي و قله إني كثير بحبك
( و هون هادي قاطعها و كان عم كثير عم يسعل و قال هادي عم يختنق و صارت
تقله لأ بعيد الشر عنك و بس أعتذر منا باسل لأنه في ضغط على الخطوط )

باسل: خلينا نسمع محطة
( و حطوا تبكي الطيور، و طبعا كالعادة هادي صار يغني مع الأغنية و يضحك )

باسل : بدنا نأخذ اتصال من الملحن فادي مارديني / و هو ملحن سوري
معروف / و كثير حكى هادي عنه كثير و هو كثير بيحبه و رح يكون في تعاون
إن شاء الله بينهم و فادي كثير كمان حكى عن هادي و قال
أنه هو النجم المثالي و الشب الحلو و المطرب المثقف و بعدها أخدوا إعلان
و رجعوا يكملوا

باسل : هادي بلش ينزع لنا الديكور بالأستوديو ،
/ هادي يضحك /

باسل : متابعين معكم مستمعينا و رح أنتقل أنا وهادي لفقرة اسمها آخر
مرة و رح أسألك عن أشياء مرقت فيها و تحكيلنا عن أشياء آخر مرة عملتها ،

هادي : أوكي يلا

باسل: آخر مرة رحت فيها ع الجنينة / الحديقة / ؟

هادي : من زمان قبل السوبر ستار

باسل : آخر كتاب أو مقال أو مجلة قرأته متى و شو كان ؟

هادي : من 3 أيام كتاب الميثاق الشعب للكاتب هنري حمد ،

باسل : آخر فيلم حضرته متى ؟

هادي : فيلم نونيا لأنه الأسد بينتصر آخر الشي بحبه / يضحك / لأنه كمان
برجي الأسد ،

باسل : آخر ألبوم اشتريته ؟

هادي : عمرو دياب الألبوم بيعقد كثير حلو و حبيته ،

باسل : آخر مرة بكيت فيها متى و ليش ؟

هادي : من جمعة بكيت بس ما فيني قلك ليش بس شي غير الحب أطمن / يضحك /

باسل: آخر مرة وقفت فيها بدهشة قدام التلفزيون لسبب أو لآخر؟

هادي : ما بحضر تلفزيون كثير ،

باسل : آخر مرة قلت فيها لحالك برافو ؟

هادي : إني أتعرفت عليكم عنجد مكسب و حياة الله عيلة ،

باسل : آخر هدية وصلتك شو المناسبة و من مين ؟

هادي : بعيد الحب من أمي يلي ببيروت ،

باسل : آخر تلفون مع أمرأة عملته مع مين ؟

هادي : ما فيني أحكي / يضحك / لأ عم أمزح ما في امرأة لأ حكيت بس بدون
ما خبرك / يضحك /

باسل : رح أسألك كمان مجموعة أسئلة بدي تجاوبني عليها بنعم أو لا أوكي ؟
منبدأ بتحس أنه شهرة شادي أسود الكبيرة كونه سبقك بالفن أثرت عليك و
صار اسمك مرتبط باسمه ؟

هادي: أي أكيد،

باسل: هل تعيش حاليا قصة حب ؟

هادي : /يضحك / ما بعرف ما رح أقدر قلك نعم أو لا لأنه السؤال صعب و ما
رح أحكي / و يضحك /

و هون باسل سأله : طيب حبيبتك لبنانية ؟

هادي : حبيبتي بعد ما أنخلقت / و يضحك /
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://aswadsbrothers.phpbb9.com/profile.forum?mode=register&
أكتر وحدة بتحبهم بلعالم
عضو نشيط
عضو نشيط
avatar

انثى عدد الرسائل : 141
تاريخ التسجيل : 04/01/2008

مُساهمةموضوع: رد: مقابلة هادي في المدينة تغني   الثلاثاء فبراير 12, 2008 7:31 pm

باسل: راضي عن المرحلة يلي وصلت لها بسوبر ستار ؟

هادي : أي أكيد منيح

، باسل : التصويت بسوبر ستار كذبة أم حقيقة ؟

هادي: حقيقة أكيد و في عالم انظلمت مثل شهد برمدا و فيني قلك أكيد
حقيقة بس في ناس أنظلمت شهد برمدا ما اتصوتلها كثير بس كثير زعلت أنها
ما نجحت يعني بنت سورية و صوتها حلو و ما تنجح حرام ،

باسل : أتأثرت علاقتك الفنية مع المستقبل بسبب الأوضاع السياسية ؟

هادي : أي أكيد ،

باسل : إذا عرضت عليك الجنسية اللبنانية بتوافق أو لا ؟

هادي : أنا بفتخر بجنسيتي ،

باسل : عندك عتب على الإعلام السوري ؟

هادي : أي كثييييييير بس عليكم لأ ،

باسل : شكلك ساعدك بالوصول لقلوب العالم ؟

هادي : أي أكيد لأنه شي بيكمل شي ،

باسل : راضي عن نتيجة سوبر ستار الثالث ؟

هادي : / يتنهد / كوني أنا سوري كنت بتمنى شهد بس الله يوفق الكل ،

باسل : تابعت ستار أكاديمي ؟

هادي : لأ لأنه ما بتابع تلفزيون ،

باسل : على كل حال خلصنا كمان هي الفقرة و رح نقرأ sms من سوزان بتقول
هي كثير بتحبك و يا هادي لسانك عم ينقط عسل بشهده

، هادي : / يضحك / حلوة هي عسل بشهده عجبتني ،
( و حطوا مقطع من أغنية و لا كلمة من الموال يلي غناها بسوبر ستار و صار
هادي يغني مع الأغنية و يشاغب طبعا و يقول الله و يضحك و كمان يقول الله يا
أبو الهود الله
و يضحك و يقول سماع هالصوت العريض و يضحك )
( و أخدوا عدة اتصالات و أولها كان كثير اتصال مهضوم من صبية اسمها عبلة
و صارت تقله هاي هادي و هو يرد عليها هاي و رحمة الله
و يضحك و سلمت عليه و أبدت إعجابها فيه و بعدها حطوا أغنية بستان
ورود )

باسل: هادي صفات يمكن تكون موجودة بشخصيتك أو لأ رح أعطيك خيارين و أنت
بدك تختار وحدة منهم أوكي يلا منبلش المظهر تبعك يلي بيشوفك بيقول أنه
ما كثير بتختلط بالناس هل هو خجل أو انطواء ؟

هادي : و الله خجل ،

باسل : أنت واقعي أم حالم و رومانسي ؟

هادي : أووووووف شو واقعي ،

باسل : أنت نسونجي و لا زاهد ؟

هادي : / يضحك / نسونجي / يضحك /

باسل : سريع الانفعال و لا دمك بارد ؟

هادي : لأ سريع الانفعال ،

باسل : صبور ولا بتطنش ؟

هادي : لأ بطنش ،

باسل : مبادر أو بتنتظر الآخرين ليبادروا ؟

هادي : لأ بنتظر الآخرين ليبادروا ،

باسل : دقيق بمواعيدك أو لأ ؟

هادي : أهم الشي مواعيدي أدق منك إذا بتعرف ،

باسل : أنا امبارح تأخرت عليه 5 دقائق لهلأ عم يهيني فيها هادي معلش
بيطلعلك بدنا ندللوا / يضحكوا /

هادي : هي الربع ساعة تأخير مسموحة عالميا أطمن / يضحك /

باسل : متفائل أم لا مبالي ؟

هادي : لأ متفائل ،

باسل : حبيب أو انتقائي ، هادي : / يضحك / انتقائي ،

باسل : متكلم و لا مستمع ؟

هادي : مستمع أكثر ،

باسل : بتحلم بالتغيير أم بتبادر للتغيير ؟

هادي: أبادر للتغيير،

باسل: سريع البديهة أو عميق التفكير ؟

هادي: الاثنين و الله،

باسل: بليغ بالتعبير أو يلي بقلبك على لسانك؟

هادي : هي المشكلة التعبير أبدا ماني شاطر فيها و ربط الجمل و أنا
إنسان فاشل بالعربي يا جماعة / و يضحك /

، باسل: بتلقطها ع الطاير و لا بتكشها من قدامك ؟

هادي : لأ هو إجمالا عندي شبكة عنكبوت مخبيها بالبيت بلقطها ،

باسل : بتسمع أو بتشوف ؟

هادي : لأ بسمع أكثر ،

باسل : بتحب المرأة الشرقية أو الغربية ؟

هادي: الشرقية لا قبلها و لا بعدها / يضحك / ،

باسل : الترتيب عندك داخلي أم خارجي أولآ ؟

هادي : داخلي طبعا ،

باسل : متهور أم متحكم ؟

هادي : ما فيني قلك متحكم لأني أحيانا بتهور / يضحك / ،

باسل : واثق أم مرتاب ؟

هادي: مرتاب،

باسل: ليش عندك قلة ثقة بالآخرين ؟

هادي : لأ بحالي ،

باسل : متأقلم أم متمرد ؟

هادي : متأقلم ،

باسل : على كل كمان هي الفقرة خلصت ، رح نسمع ريمكس لأغنية بيستاهل
قلبك لهادي أسود من تقديم dj يحيى جانو بتسمعوه لأول مرة ع المدينة
تغني ( و حطوا الريمكس للأغنية و كان كثير حلو ) ،

باسل : بيستاهل هادي هالريمكس شو هادي حبيته ؟

هادي : بيجنن عنجد و الله يعطيه العافية أهم dj بسوريا و الله ،

باسل : على كل محضر مجموعة من المقاطع الغنائية رح نسمع كل مقطع و نعلق
عليه ( و حطوا أغنية قتلوني عيونا السود لوديع الصافي )

باسل : عم نسمع وديع الصافي بحس أنك كثير متأثر بوديع و كل يلي
بيعرفوك بيعرفوا أنك من أشد المعجبين فيه و حتى غنيت له بسوبر ستار ؟

هادي : بعشقه يعني إذا بيصحلي آخذ من عمري و أعطيه و الله ما بقصر / و
يضحك / و عنجد هو فنان بأخلاقه وكمان لأنه الكبار كبار ما حدا بيصير
مثلهم ،

باسل : بدنا نسمع مقطع بصوتك لوديع الصافي و نهديها له ،

هادي : أي أكيد ( و غنى موال يا ما أنا و الليل لوديع الصافي )

باسل : الله على هالصوت يخزي العين يا هادي كل هاد و أنت مرشح و مريض لو
ما كنت مريض كيف غنيت ، الله عليك ، كمان رح ننتقل لمقطع ثاني ( و حطوا
أغنية أنا لحبيبي لفيروز و هادي صار يقول الله الله )

باسل : أنا بحب فيروز كثير و أنت كمان يعني سمعت انه موبايلك كل نغماته
فيروز بتحبها لفيروز ؟

هادي : أي و الله يقبرني ربها شو بحبها ،

باسل : طيب إذا قالوا لك عندك دقيقة تحكي فيها معها على التلفون شو رح
تقول لها ؟

هادي : لو شو ما كان عندي بلغيه و بحكيها بس شو بدي قلها ما بعرف بس
بوس لها أيدها بس / و يضحك / و بيرتبط لساني ما بعرف أحكي أكيد ،

باسل : طيب نسمع مقطع صغير منك لفيروز ،

هادي : / يضحك / رح أتجرأ و غني ( و غنى حبيتك بالصيف لفيروز ) ،

باسل : الله ، رح ننتقل لثالث مقطع سوا ( و حطوا أغنية بحبك أنا كثير
وائل كفوري و هون هادي ضحك و صار يقول الله و غنى مع الأغنية بشكل كثير
حلو و حساس ) ،

باسل : وصلنا الجواب و ما في داعي نسألك عن حبك لوائل كفوري و مننتقل
للمقطع الرابع و منسمع سوا / هادي يضحك /
( و حطوا أغنية قولك ما عندي قلب لأيمن الأعتر و صار هادي يغني مع الأغنية
و يقول الله يا أيمن ) ،

باسل : عم نسمع سوبر ستار العرب أيمن الأعتر ، هادي سمعت الألبوم كله ؟

هادي : / يضحك / حافظه أكيد و سمعته كله و خاصة هي الأغنية كثير بحبها
ألحان زياد بطرس يلي بوجهله تحية و كثير أصحاب أنا و هو و أيمن فعلا أنا
بقله أنه هو عنجد سوبر ستار ،

باسل : برأيك لسه في محبة بين نجوم سوبر ستار و أنت مع مين بتحكي مع
زملائك بسوبر ستار ؟

هادي : أنا إجمالا كلهم بحكي معهم بالتلفونات يلي بعاد بالمسافات أما
يلي بقدر شوفهم بشوفهم أكيد بس أكثر الشي بضل على صلة مع عبير نعمة و
حسام مدنية يلي بوجه له تحية كبيرة حبيب قلبي ،

باسل : أوكي خلينا ننتقل لمقطع جديد ( و حطوا أغنية مأثر فيي فضل شاكر
و هون هادي صار يقول بصوت كثير عالي الله الله و يضحك و طبعا غنى مع
الأغنية)

باسل : بدي احكي شي هالأغنية كان لها قصة معك كنت سمعتها قبل ما تتسجل
بصوت فضل شاكر من الملحن طارق أبو جودة و لكن المستقبل رفضوا يأخذوا
اللحن من طارق على اعتبار في تعامل معين مع أشخاص
معينين و الأغاني كانت محضرة .....إلخ شو حسيت لما سمعتها للأغنية و
حسيت أنه هالأغنية كانت بيوم من الأيام سمعتها و عجبتك و كان لازم تغنيها
؟

هادي : حسيت أنه قد ما غنيتها ما رح غنيها أحلى من فضل شاكر أكيد فأنا
بحب فضل شاكر و نحن كثير أصحاب و منحكي بعض على طول و هو على طول بيقلي
حبيبي هادي أنا خيك الكبير إيمتى ما بدك احكي
معي عنجد و لا أطيب من هيك الله يحميه و يوفقه ،

باسل : مننتقل لآخر مقطع ( و حطوا أغنية بناديلك لجاد شويري )

باسل: مانك حافظ الأغنية هادي .. ؟

هادي : هلأ قبل ما شوف جاد شويري شخصي شفته عند المصور تبعي رامي بربور
يلي أنا بحبه كثير و كنت قول عادي ما بيعنيلي شي كنت قول برافو عليه
ذكي عم يخلي الناس تحكي فيه بس كفن ما كان يعنيلي
شي بس شفته شخصي يلي ما بيعرفوا عنجد بيجهلوا و لا أطيب من هيك كمان
بيقلك أنا ماني وديع الصافي و لا صابر الرباعي بس أنا بدي غني

، باسل : طيب بس هي الجملة صارت حجة كثار يعني كل عارضة أزياء بدا تغني
بتقلك أنا ماني أم كلثوم أنا عم أدي ؟

هادي : بس حلو الإنسان يلي بيعرف حاله يعني هيفاء وهبي و لا أطيب من هيك
ليه؟ بتقلك أنا ماني مطربة أنا فنانة استعراضية ،

باسل : شو قصتك أنت و هيفاء سمعنا أنه صار اتصال بينكم أو هيك شي ؟

هادي : / صار يمزح و يضحك و يسعل / و الله ما في شي بس هيفاء أول وحدة
هنتني بالكليب هي و الأستاذ فضل شاكر و وائل جسار و عاصي الحلاني ،

باسل : بتحبها لهيفاء ؟

هادي : مين ما بيحبها ؟؟!!

باسل : شو بتحب فيها ؟

هادي : كل شي و صوتها أهم الشي / يضحك / ،

باسل : صوتها قلتلي آه صوتها ؟؟!! / يضحك /

باسل : هادي وصلنا تقريبا لنهاية حلقتنا ،

هادي مقاطعا : ما بدي ،

باسل : خلاص أوكي منرجع منبلش من جديد / و يضحكوا / ،

باسل : أنا أتشرفت بوجودك معنا يا هادي و نحن مبسوطين معك و بدنا نغني
شي نختم فيه شو رأيك هادي ؟

هادي : بدي غني موال لوائل كفوري كثير بحبه بس قديم شوي ( و غنى موال
يا جارتي لوائل كفوري)
( حطوا بعدها مقطع من بيستاهل قلبك ) ،

باسل : مستمعينا بتستاهلوا تسمعوا كل الحلا من عنا و كمان بتستاهلوا
تكونوا على تواصل مع مطربينكم عبر إذاعتنا إذاعة المدينة أول إذاعة
خاصة بسوريا ،

هادي مقاطعا : أحلى إذاعة و الله / و يضحك /

باسل : مع الأسف وصلنا لنهاية حلقتنا المميزة لليوم هادي الكلمة الأخيرة
لك ،

هادي : الكلمة الأخيرة أول الشي بدي أشكر أهم الشي الناس لأنه لولا الناس
نحن لا كنا هون و بدي أشكر كل مستمعينا و كل الناس يلي بعدا واقفة معي و
بعدا بتعرفني و بتحبني و بتمنى أنه يضلوا هيك و يزيدوا
يا رب و كمان بدي أشكرك أنت باسل و قول لكل الصبايا أنه عنجد أحلى شب و
غطى عليي و منيح يلي ما في كاميرا / يضحك / و بدي أشكر كل العاملين
بالمدينة و خاصة ميشيل و كل حدا عم ينجح الإذاعة و بتمنى
تضلوا الأوائل و تضل الإذاعة الأولى و منها لأكثر نجاحات ،

باسل : شكرا هادي أنا بتمنى ترجعلنا بخير من أمريكا و نسمع لك شي جديد
قريبا من أنتاجك يا رب و شكرا لكل الناس يلي سمعتنا مني أنا باسل محرز
تبقوا بخير
( و هيك خلص اللقاء و حطوا بيستاهل قلبك )
[/b]
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://aswadsbrothers.phpbb9.com/profile.forum?mode=register&
جنوني شادي وهادي
عضو على وسام الشرف
عضو على وسام الشرف
avatar

انثى عدد الرسائل : 427
العمر : 30
البلد : الـــســـعوديه
تاريخ التسجيل : 04/02/2008

مُساهمةموضوع: رد: مقابلة هادي في المدينة تغني   الثلاثاء فبراير 12, 2008 9:49 pm

مرسي يا قلبي عنجد كلك ذوق والمقابله كتتتتتييييير بتجنن يقبر قلبي انشالله ع هالروح الحلوه اللي عندو .
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://google.com
shada
عضو على وسام الشرف
عضو على وسام الشرف
avatar

انثى عدد الرسائل : 699
العمر : 27
البلد : الاردن
تاريخ التسجيل : 29/09/2007

مُساهمةموضوع: رد: مقابلة هادي في المدينة تغني   الأربعاء فبراير 13, 2008 9:41 am

يسلملي هادي وباسل التنين حلوين متل القمر ما شاء الله عليهم

ويسلم هدوش شو دمه خفيف وريتها ما تختفي الضحكه عن وجهك يا رب

شكرا كتير على اللقاء الروعه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://launch.groups.yahoo.com/group/Shady_Aswad/
bleeding love
عضو برونزي
عضو برونزي
avatar

انثى عدد الرسائل : 1007
العمر : 30
تاريخ التسجيل : 06/10/2007

مُساهمةموضوع: رد: مقابلة هادي في المدينة تغني   الأربعاء فبراير 13, 2008 11:09 am

اللقاء كان كتييييييييييييير حلو
وهادي كان مهضوووم كتير

مشكوووره حياتي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://www.hadi-aswad.com
احلى رومي
عضو برونزي
عضو برونزي
avatar

انثى عدد الرسائل : 876
العمر : 30
البلد : السعـــــــــــــودية
تاريخ التسجيل : 26/09/2007

مُساهمةموضوع: رد: مقابلة هادي في المدينة تغني   الخميس أبريل 10, 2008 7:13 am

مقابلة بتجنن ريتني سمعتها ..
يسلمو قلبو كتير انبسطنا بالمقابلة
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
مقابلة هادي في المدينة تغني
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديـــــــــــــــــــــــات الاخـوين شــــــــــــادي وهـــــــــــادي اسود :: منتدى هــــــــــــــــــــادي اسود :: «(·´¯`·.·÷×اخر اخبار هــــــــــــــــــــــــــادي اسود×÷·.·´¯`·)»-
انتقل الى: